政情：劉夢熊酒店密會梁美芬
新界村屋僭建風波，政府話唔會特赦．新界人又話會流血抗爭，唔知點收科。近期成為「新界代言人」嘅全國政協委員劉夢熊就有新動作，佢話搵到本身係律師嘅立法會議員梁美芬支持，認同新界僭建問題可以用補地價解決，特赦無危險嘅僭建物。
劉夢熊尋日爆料話，早幾日喺酒店密會梁美芬，大家飲茶傾吓偈，兩人一拍即合。梁美芬承認真有其事，又話從法律觀點睇，新界村屋只要符合安全，點解唔可以特赦喎。佢仲建議成立委員會，審查班鄉紳係咪「貪婪」，如果係先強硬執法拆卸。但到底點衡量一個人係咪「貪婪」，真係佢先至知。
尋日劉夢熊約咗十八鄉鄉事委員會主席梁福元去東頭村視察村屋，本來叫埋梁美芬入去，但最後梁美芬甩底，劉夢熊惟有話「美芬」因為要開會嚟唔到。最後為咗同班鄉親交代，劉夢熊即場公開梁美芬個手機號碼，叫大家有乜事可打畀美芬喎。