自由黨主席劉健儀（Miriam）自從對外放風，考慮轉戰港島後，佢喺航運交通界嘅議席即惹來各方覬覦。最新消息係同黨嘅香港進出口汽車商會會長羅少雄（Paul）有意競爭，但聽聞Miriam心目中另有接班人選，因而令阿Paul萌生退黨念頭，打算過檔對家經濟動力。
我哋尋日問過阿Paul係咪退黨，佢唔肯直認，只係話政治嘅嘢一日都嫌長，過幾日可能有啲決定喎，似乎有意離開。不過，該黨副主席周梁淑怡（莎姐）就話，最近無收過有黨員要求退黨，又話如果阿Paul走人，真係好大損失，聽莎姐咁講，即係仲有彎轉啦！
有該黨中人話，阿Paul喺交通業界都有一定支持度，喺黨內等咗十幾年，都係想做立法會議員，如果該黨唔畀個好啲嘅條件去挽留佢，阿Paul可以隨時退黨，再喺九月參選立法會。
據聞經濟動力已經向阿Paul招手，打過幾次電話游說佢過檔，究竟走定唔走，好快就會明朗化。