政情：孫公帶病戰到最後一刻
早前入院做小腸氣手術嘅教育局局長孫明揚，休養兩星期後尋日復工，佢朝早返到政府總部時，聲稱自己身體幾好。問佢會否提早退休時，孫公就話，今屆政府任期只餘下兩個多月，暗示會捱到六月底任期完結為止，可以講係帶病作戰到最後一分鐘。
孫公呢兩年體弱多病，除咗本身患有腎病要定期做腹膜透析外，之前又不幸感染退伍軍人症桿菌，好彩大步檻過。但不幸事接二連三，佢上月因半夜三更喺屋企掛住睇球賽賽果，搞到跌傷右手導致骨裂，尋日復工仍然包紮住；最近仲入院做小腸氣手術添。講開又講，記得我哋年初搵術數師批過，話孫公喺龍年嘅「洩氣」太重，好應該提早退休，但如今孫公堅持做到任期尾，究竟係佢嘅責任心重吖？抑或係緊張份約滿酬金呢？