政情：煲呔曾那渣舊招遮醜

煲呔曾貪盡富豪海陸空款待令全城嘩然，其後又爆出佢以「無字天書」規管自己利益申報，社會要求加強規管特首利益申報嘅呼聲愈來愈高，尋日立法會討論特首申報利益及避免潛在利益衝突安排，理應各界都會金睛火眼（目及）到實，點知夕陽政府又出陰招保駕護航，首先派出較低級嘅政制及內地事務局副秘書長梁松泰上陣，將問題卸晒畀獨立檢討委員會考慮。

特首辦急向建制派拉票

與此同時，商務及經濟發展局突然將封塵多時嘅《淫褻及不雅物品管制條例》再諮詢三個月；而曾經做過特首辦主任嘅政制及內地事務局局長譚志源亦赤膊上陣，除咗交代九月立法會選舉實務安排外，又講司局長薪酬釐定及區議會「連環種票」事件後嘅選民登記制度。明眼人都睇得出佢哋想幫手淡化尋日立法會就特首利益申報嘅討論，以及明日立法會對煲呔曾嘅不信任動議。

由於周三立法會大會要處理嘅動議好多，估計煲呔曾嘅不信任動議最快要喺周四下午才能表決。據聞煲呔曾緊張兼騰雞，特首辦於是派人四出向建制派議員拉票，包括詢問佢哋由明日起一連三日係咪身在香港，務求任何時候表決都有足夠嘅人否決呢個不信任動議。話時話，夕陽政府用舊橋幫煲呔曾臭屎密冚都非首次，煲呔曾次次出事都要人哋打救，認真累人累物。