中環出更：「心蓮心」籌款 名媛為善最樂
城中名媛向來善心，為幫助受虐婦女，上周六喺港島金鐘香格里拉宴會廳舉行「心蓮心」慈善晚宴，近百美女雲集，十足「女兒國」。撐場嘅名媛、淑女齊發功，捐錢之餘，又捐手袋、鑽飾及名酒，一晚輕易籌得逾二百萬元善款。
身為籌委會主席之一嘅李錦記新抱Mahnaz Lee，穿上一襲肉色Blanc de Chine旗袍，高貴優雅。Mahnaz深得奶奶愛錫，親自撐場，老公李惠雄及兒子Jason都嚟打氣。Adler珠寶老闆娘何彭慧嫻（Patti）都係搞手之一，佢出動五歲孫兒陳梓晉上台拉小提琴籌款，淡定台風，博得全場掌聲。
王以智叫姊妹放遠眼光
籌委會成員之一嘅保良局總理陳正欣太太Angel都唔執輸，穿上Valentino黑色蕾絲裙，配襯價值廿多萬元嘅Delices de Cartier系列鑽石手錶，貴氣十足。Angel除咗買枱支持外，仲捐出一個價值逾萬元嘅MCM手袋作慈善拍賣，陳正欣就送出兩支價值六千多元嘅Chateau Margaux拍賣，愛心爆棚。
前滙豐私人銀行亞洲區行政總裁王以智（Monica）都嚟撐場。「盛女」話題成為全城熱話，Monica讚香港女仔多才多藝，絕非「賣剩蔗」，呼籲姊妹將眼光放遠啲，努力學習新事物，唔一定要靠男人。Monica嚟緊會去俄羅斯旅行，增廣見聞。社交名人李桂蘭就教「盛女」們放下自我，學會溫柔：「男人唔要女人太叻，柔情似水嘅女人，先最吸引！」姊妹們，學嘢喇。
卓妮