有一件事，講出嚟大家雖然唔會覺得有乜新意，不過仍然會火滾。呢一件事就係，港鐵賺大錢，照樣要加價，講完。
冇錯，係唔會覺得有乜新意㗎嘞，之但係正正由於餐餐都係咁，從來冇一次例外，先至令人嬲到眼火爆。喂，你幾時見過港鐵蝕錢？你又幾時見過港鐵減價？冇見過吖嘛，反而賺錢加價係見慣見熟嘅恒常狀態，可惡嘅係政府手握港鐵七成半股權，冇一次以老闆身份叫停呢一種巧取豪奪嘅殘民行為。
港鐵舊年又勁賺一百四十七億元喇，又話今年六月加價百分之五點四，激起全城怒火中燒。梗係啦，冇人願意自己嘅荷包畀人撳住搶，更加唔願意見到搶自己荷包嘅賊佬居然係一個肚滿腸肥嘅大富翁。
為咗表達市民嘅不滿情緒，立法會交通事務委員會一致通過兩項動議，要求港鐵立即擱置加價，並且要求政府撥出港鐵嘅部分盈利分紅約九億元抵銷加價。不過好可惜，兩項動議都冇約束力，港產官僚依然故我漠視民怨，冇人吹得佢脹，亦冇人掹得佢長。
講到呢度，功夫茶又要搵曾蔭權出嚟，講解一下官商勾結嘅弊病。官府同商家一旦過從甚密，關係好到卿卿我我糖黐豆，受害嘅永遠係小市民，因為官府往往縱容商家向小市民開刀，無理加價都隻眼開隻眼閉。港鐵家陣係上市公司，亦即係利字當頭嘅商家，好衰唔衰政府係大股東喎，咁就唔止官商勾結啦，簡直係官商合體，合到欲仙欲死嗰隻！
好嘞，自從香港多咗一個頻頻接受富豪奢華款待嘅貪曾，你估官商勾結甚至官商合體嘅情況係會少咗呢，定係多咗？畫公仔唔使畫出腸，否則港鐵唔會咁貪得無厭刮盡每一程。
唉，賺錢加價已經夠無良，更慘嘅係港鐵服務質素冇保證。就以安裝月台幕門為例，講咗都不知幾多年嘞，東鐵線幕門居然要到二○二○年先至可以投入服務，即係仲要等多八年，期間乘客隨時因為冇幕門而誤墮路軌被撞至血肉模糊。
安裝月台幕門慢過烏龜，加設廁所亦係拉牛上樹。港鐵話喎，將會斥資十億元提升車站設施同服務，旺角、太子同金鐘站將於二○一五年底前加設公共洗手間，同時加裝十三部連接車站大堂同地面嘅升降機。至於其餘未有公共洗手間嘅七個轉線車站，將於二○二○年底前加裝。換言之，興建廁所嘅漫長時間係三至八年，效率之低世間罕見。
所以話啫，今年七月一日政府換屆可以話係香港嘅「重光紀念日」，掃走貪曾等於趕走瘟神。下屆政府上台之後，官商勾結未必消失，至少有希望阻止問題繼續惡化吖嘛！