政情：梳化搬舊政總惹聯想
日前我哋講過，政府總部搬咗去金鐘添馬艦後，舊政府總部西座現時只剩番四個部門辦公，當中包括候任特首梁振英（CY）辦公室。雖然CY搬入西座後增添不少人氣，但出入嘅人始終唔多，但尋日下晝兩點幾鐘，我哋發現有幾個工人將一批傢俬，經皇后大道中西座入口搬上舊政府總部。堆傢俬包括幾張枱同櫈、仲有一張橙紅色嘅大梳化。又係梳化？令人無限聯想。
話說呢批傢俬上面有張紙，寫明啲傢俬屬於行政會議秘書處，但唔知係咪搬上去十二樓畀CY用嘅呢？講開又講，雖然依家舊政府總部處於近乎丟空狀態，但原來日常開支仍然不菲。行政署話，政府總部未搬屋前嘅電費、水費、保安等雜項開支，每月平均大約一百八十三萬元，但今年頭兩個月嘅平均開支都要接近七十萬元，按比例計算都幾貴吓，如果唔及早搬走埋餘下部門，只會浪費公帑。