還記得社民連喺上月下旬第二場特首選舉辯論，帶同自製「坦克車」道具到場示威抗議，成功吸引大家注意，自此部「坦克車」就出晒名。到上月廿五日特首選舉投票日，社民連亦帶同「坦克車」到場，事後大家發現原來有關「坦克車」係由阿牛製作，多間大學即時邀請佢教大家整「坦克車」。
阿牛話，其實「坦克車」好容易整，最主要嘅道具係紙皮同油漆，又話尋日一共整咗六部「坦克車」，夾埋都只係百多元；佢又希望藉此啟發大家，示威抗議非獨沽一味，可以有多啲噱頭喎。究竟班大學生經過阿牛教路後，以後會否推出更多新示威物品，呢個大家就要密切留意喇。