政情：阿二爭崩頭 橄欖唔退
各政團正就九月立會選舉作最後部署，各大黨派嘅第二梯隊能否「上位」，相信短期內會有結果。不過，近日就傳出民建聯九龍東支部為爭位爆內訌，據聞年前盛傳會引退嘅陳鑑林（橄欖），為咗「維穩」會繼續坐鎮，令到黨內第二梯隊嘅黃大仙區議員黎榮浩（Joe）同陳曼琪（Maggie）為排名單第二位爭到出面，究竟邊個可以脫穎而出，好快就會浮上水面。
下屆立法會九龍東議席會由四席增至五席，多年來都平分秋色嘅泛民主派同建制派都想取得優勢。由於建制派暗撐形象相對獨立嘅律師謝偉俊，由旅遊界功能界別轉戰九龍東直選，因而令到一直有意分拆名單出選嘅民建聯，好大機會繼續只派出一張名單參選，換句話該黨想攞多個議席都好艱難。本來橄欖退位可令第二梯隊上位，但如今佢繼續帶隊，意味第二梯隊上位無望。
部署下屆接班
據聞橄欖唔退，雖然令第二梯隊難以進身立法會，但有地區消息盛傳，誰人能夠排喺參選名單第二名，四年後將有望成為橄欖嘅接班人。有傳呢個消息就令到一直喺黃大仙經營嘅阿Joe同Maggie為爭排名單第二暗中角力，其中有傳Maggie開到聲話，如果佢無得排第二，都唔願意排第三，又話自己本身女性同律師嘅專業形象有助參選名單吸票喎。
另一邊廂，阿Joe亦非省油燈，佢除咗得到九龍東較有影響力嘅人士支持外，喺黃大仙亦得到較多黨友認可，加上佢嘅地區工作相當紮實，所以至今同Maggie仍然爭持不下。我哋曾經搵過Maggie，但未能聯絡上。話時話，政治一日都嫌長，四年後乜嘢政治環境真係無人知，如果為咗排第二出選都爭一餐，傷咗黨內和氣卻係得不償失，相信呢啲就係所謂嘅自亂陣腳喇，為何佢哋不用內部民調來決定出線權呢？