中環出更：陳光明展示「至潮」工藝品
潮州美食街知巷聞，原來潮州工藝都一樣咁出名。潮州商會青委主任陳光明（Johnny）花咗一年多時間，搜羅十四件潮州工藝精品，總值過千萬元，全部運送來港，將於本月二十日至二十六日分別喺九龍圓方商場及青衣城展出。咪以為潮州工藝品一定好老餅，查實潮州金漆木雕、刺繡等世界聞名，「潮繡」更係古代達官貴人先用得起。
巨木雕蝦蟹簍成焦點
為咗今次潮州工藝精品展，Johnny聯同潮商會長陳幼南及青委副主任胡炎松幾度走訪潮州民間博物館，捐窿捐罅，最終搵到一批薄如紙嘅陶瓷，以及栩栩如生嘅泥塑，包括凸花花瓶、立體花碟等。而今次展覽嘅焦點，係一尊名為「蝦蟹簍」嘅巨型木雕，採用珍貴樹種紅豆杉為原料，木質油潤，色澤典雅，價值高達七位數字。
卓妮