中環出更：雷禮權怕撞衫 拒大路名牌
九巴後人雷禮權（William）衣着潮爆，形象永遠快人一步，但佢自嘲年齡已經五張嘢有多，再潮多幾年就要退隱江湖喎。趁還有青春好時光，佢試盡各款誇張造型，但唯一戒條就係拒絕着大路名牌，免同內地同胞撞衫瘀爆。
化妝品連鎖店莎莎國際，尋日舉辦「第二屆香水奧斯卡」頒獎禮，城中名人盛裝到賀。William擔任頒獎嘉賓，身上一襲黑白間條西裝搶晒鏡，原來套衫購自美國，屬Calvin Klein Couture系列，全港只得六套，保證撞衫機會微。為着靚衫，William三圍keep得fit，胸肌同腰圍fit過廿歲後生仔。
William嘅靚太太利蘊珍都有現身，問到佢丈夫家族嘅一級歷史建築物「雷生春」活化變身浸會大學中醫藥學院「雷生春堂」，佢話未去過雷生春，又話自己好少睇中醫，因為平時多運動、少病痛喎。
郭少明追睇外孫新相
莎莎國際老闆郭少明都唔執輸，着上米色ERTO西裝，配黃色花恤衫，入型入格。千金詩慧近日誕下麟兒，郭少明笑言每日有BB新相睇，心境更年輕，佢仲準備為孫兒頌言擺百日宴，但囡囡比佢更緊張，爭住做搞手。名人子女，個個得寵，連帶中華總商會會長蔡冠深太太蔡關穎琴，都刻意特訓兒子。佢透露剛由瀋陽探望大仔Johnson返港，事關老公想鍛煉兒子，現階段唔畀大仔放假，做媽咪嘅，惟有坐飛機去探仔囉。
卓妮