當你聽到長沙灣連翔道一夜之間有大約四十個坑渠蓋神秘失蹤，你會有乜嘢感想呢？功夫茶第一個感想就係偷鐵黨膽大包天乜都敢偷，遲早禮賓府鐵閘都會不翼而飛，變身另一個「門常開」。其次咯喎，比較積極嘅感想就係「回收有價」，廢物回收換取報酬係一條諗得過嘅環保大計。
未講有利可圖嘅廢物回收之前，不如先睇睇特區政府嘅聰明笨伯有乜嘢計仔保護環境。繼膠袋徵費之後，環保署推出垃圾徵費計劃，諮詢期剛剛好今日結束。根據官老爺嘅滿肚密圈，有五個收費模式可供選擇，包括逐戶收費、整幢大廈收費、按垃圾車重量收費、按用水程度收費或者按差餉水平收費。
之不過咁，問題多多，如果整幢大廈收費，所有人繳交嘅費用一樣，咁就無法鼓勵用戶減少廢物啦，你知香港人幾識諗縮數至得㗎。逐戶收費行政上有困難，如果有人將垃圾丟棄於後樓梯，搵邊鬼個認頭呢？仲有喎，實施垃圾徵費計劃之後，隨時出現百年難得一見嘅奇景，街上一個垃圾桶都冇，原因係避免有人偷偷摸摸享受「免費揼垃圾」嘅樂趣。
除此之外，小商戶牙痛咁聲，認為垃圾徵費必定會增加經營成本。就以香港餐飲聯業協會為例，擔心新措施進一步加重業界負擔，再次打擊小商戶生存空間。
其他環保團體又有乜意見呢？普遍批評政府一直未做好源頭減廢及分類回收，導致「有用垃圾」都被丟到堆填區。綠領行動調查顯示，六成市民認為應該提供廚餘及樓層分類回收設施。地球之友做過廚餘回收實驗，結果有廚餘回收嘅家庭每月平均只用十個垃圾袋，比起冇回收嘅家庭少用六成。即係話，廚餘回收係可行嘅。
計功夫茶話齋，更加可取嘅方法係推廣「廢物有價」嘅概念，實行有償回收方案。好似綠長青環保協進會咁吖，喺六條公共屋邨發起有償回收行動，反應不知幾咁踴躍，大約二萬名居民參與其中。喂，重賞之下必有勇夫吖嘛，若然廢物攞去回收可以換來金錢利益，係人都唔執輸啦，一旦雷厲風行咯喎，減少廢物送去堆填區自然事半功倍，話唔定極具爭議性嘅興建焚化爐計劃都可以束之高閣。
即係咁，禮失求諸野，既然負責環保嘅官場中人都係蠶蟲師爺，諗來諗去都諗唔出有效辦法減少廢物，咁就不如參考民間組織嘅街坊智慧。借用落選特首唐英年金句，環保政策唔可以Completely Rubbish，至於為官之道，更加唔應該淪為廢物！
總而言之，環保難靠官垃圾，廢物回收是上策！