「史上最廢財爺」鬍鬚曾又「講嘢」啦！臨收工唔通才有好嘢介紹，鬍鬚曾透過其網誌話，本港樓市受到兩股不尋常力量影響——超低利率同埋外圍經濟下行風險，提醒市民切勿跟風入市喎！
咁即係點啊？鬼唔知阿媽係女人咩？其實，除咗兩大因素，仲有內地啲豪客，掃到本港樓市「唔係好健康」咁「生長」。最叻出口術嘅鬍鬚曾疾呼：樓價已經貴過九七高位，政府會密切注視，「有需要時會毫不猶豫推出進一步措施」，呢呢呢，就係喺佢毫不猶豫下，香港樓價高處未算高，已經升到四百萬嘅樓都係「窮人恩物」！有售樓廣告真係咁寫。
阿哥，最低工資都係時薪廿八蚊啫！你話香港呢個國際都會，唔通個個都咁富貴？想做「窮人」都要有四百萬噃！
鬍鬚曾，你估你真係救世主？係神？出吓口術就救到樓市？你繼續出口術、繼續注視，樓市都係會照升！信你嘅，更多窮死，好似老朽咁，一世買唔起「窮人恩物」！
老朽但知通曉古今知識的學者有兩種結果，一是在前人的基礎上又邁進了一步，一是把前人的知識搬來搬去，成了搬家公司。鬍鬚曾，你都臨收工啦，搬來搬去，最好今次搬遠啲，咁你「講嘢」頂多畀自己聽，香港人聽厭啦！
唉！失望不能屢屢重演，魯迅話齋：不斷重演的失望是扼殺希望的毒藥。只要你一走，香港一天都光晒！