唐、梁兩營，要大和解都唔係咁易。嚟緊九月立法會選舉，好似會計界咁，唐梁二營各有支持者出選。
會計界今年繼續大混戰，現任陳茂波近乎必選，但如果佢加入政府，消息話梁營或游說同為梁營支持者，身兼港區人大代表嘅資深會計師雷添良出戰，希望以佢喺會計界經驗，加上人大身份，吸盡親中從業員票。
唐營當然亦不甘示弱，「四大」會計師行合夥人劉麥嘉軒好可能會披甲上陣，由於佢政經界人脈深厚，絕對有力挑戰。除咗兩營互片，大家唔好忘記仲有年輕會計師龔耀輝，據聞佢都心郁郁，再加埋泛民梁繼昌，令會計界今屆猶如戰國時代，鹿死誰手要到最後先知。
其他界別都有類似情況，飲食界自由黨張宇人硬撼梁營黃家和；保險界陳健波亦會受梁營蔡中虎挑戰。
兩營大戰壁壘分明，就算要和解，睇怕最快都要喺立法會選舉之後，立法會齊晒腳先有機會。