政情：吳文遠為參選 棄外國護照
按照《立法會條例》，要參加立法會直選，一定不能持有外國護照。有意喺九龍西「打大佬」嘅社民連副主席吳文遠早前主動銷毀新西蘭同澳洲兩本外國護照，佢話咁做可以顯示佢有破釜沉舟嘅決心喎。雖然吳文遠嘅決心爆晒燈，但佢啲屋企人似乎就唔係好同意佢嘅做法。文遠話，佢媽咪近幾個禮拜不斷哦佢，唔明佢點解無喇喇要銷毀護照，仲同佢講從政無前途，叫佢搵過份有前途嘅工。
吳文遠決定參選，最主要嘅係錢嘅問題。佢話自己已經全力撲水，但籌款額暫時仍然係零，佢仲話到時如果真係仲未籌夠錢，就會印少啲單張同做少啲宣傳，希望可以盡量用最少嘅錢攞個議席返嚟。
南區區議員司馬文係荷蘭人，佢雖然喺香港住咗接近廿年，但仍然未攞特區護照。佢都有計劃代表公民黨參加立法會選舉，仲要係區議會超級議席添。如果咁，佢都一定要放棄咗個荷蘭護照先有得講。