政情：舊政總行將丟空 有待發落
自從政府總部搬咗去金鐘添馬艦後，坐落中環傳統心臟地帶嘅舊政府總部頓時變得冷清非常。不過，自從梁振英當選下任特首後，政府喺舊政總西座十二樓專門為佢設立候任特首辦公室。喺CY接見唔同團體時，唔少記者會聚集喺西座地下「玻璃房」內等待採訪，咁先可以為呢個幾乎空置嘅地方增加番少少人氣。
CY嘅辦公室只佔舊政總西翼嘅其中一層，行政署回答我哋嘅查詢時就話，現時仲有四個政府部門喺舊政總辦公，除咗候任特首辦公室外，仲有效率促進組、政府新聞處轄下嘅圖片資料室，同早前因為貪曾事件而成立、由前首席法官李國能主持嘅防止及處理潛在利益衝突獨立檢討委員會。行政署仲話，現時仲有約一百個職員喺舊政總返工，而所有辦公室預計會喺今年第三季前遷出。換言之當CY七一上任，舊政總就會徹底丟空，用途有待發落。