政府新班子未定，各人都有自己嘅打算。長期處於民望低位嘅政務司司長林瑞麟，尋晚八點幾突然叫政府新聞處出稿，內容講林D9喺官邸搞復活節派對，請咗八十名基層小朋友及青少年去佢官邸玩，一齊睇魔術表演、畫畫同跳繩等，仲有尋找復活蛋，節目不知幾豐富。
林D9咁積極，好難唔令人聯想起佢為咗做好形象工程，努力咁將公公形象包裝成好鍾意小朋友嘅叔叔。
林瑞麟嘅官邸Victoria House喺山頂，的確係好好嘅地方，係應該招呼多啲人去玩吓嘅，佢尋日請嘅八十人，全部都係來自天水圍同北區，擺到明係特別關心基層。
喺活動中，林D9寄語青少年同兒童要積極面對未來。佢咁積極，唔知對佢極低嘅民望有無些微復活嘅作用呢？班放復活節假去玩嘅小朋友同青少年，唔知開唔開心呢？