政情：田二少或轉戰港島

田二少自從去年區議會旗開得勝後，一直盤算緊九月立法會可以去邊度落腳，本來佢諗住喺新界西發展最穩陣，因為佢嘅票倉荃灣，估計最少都有萬幾票，再加埋新界西其餘幾區，要取得近三萬票，唔係無機會。

亦有建制派中人評估過，今屆新界西建制派已經爭崩頭，工聯會派人，民建聯更派出三張名單，譚耀宗、梁志祥同陳恆鑌，三人將分別穩守自己喺屯門、元朗、荃灣嘅地盤，建制派票源分散下，田二少應該插針都插唔入，所以早排有建制派中人仲反建議田二少去選超級議席，跨晒五區去攞票。

建制派中人咁建議，全因為唔想田二少留喺新界西爭飯食，據聞連信心爆棚嘅田二少，都知道建制派「陽謀」，諗過度過後覺得超級議席風險太高，因為建制派已有票王劉江華、票后陳婉嫻出戰，佢自己仲有幾多「鐵票」剩餘，佢一清二楚，所以現時仍傾向喺新界西出戰算數。

新人難接棒 誓保基地

不過近日又有最新變數，就係黨內評估過葉太一旦加入下屆政府，咁田二少就可能要放棄新界西轉區，轉戰港島。葉太喺港島區經營咗好幾年，成功打造建制派中產代言人形象，○八年立法會選舉，佢嘅團隊攞咗六萬一千幾票，一啲都唔簡單，如果葉太走人，貿貿然畀個黨內新人頂上，未必接到棒，相反叫田二少呢類喺全港有一定知名度嘅人出選，葉太嘅票就唔會白白流失。

田二少就同我哋講，話現時未知葉太會唔會加入政府，但如果葉太真係入閣，新民黨建議佢轉戰港島，佢都覺得有得諗，因為新民黨喺港島呢個基地唔可以失去，點都要保住喎。