中環出更：李寧李小鵬馬場騷星味
沙田馬場好墟冚，皆因久未露面嘅前體操王子李寧同家人一齊入場捧佢匹駿駒「桂花飄香」，同行仲有已退役嘅雙槓王子李小鵬，唔少馬迷都爭相一睹呢兩位體操界大明星嘅風采。
尋日李寧拖埋太太同一對仔女入馬場力撐愛駒，心情勁靚嘅佢話最近比較忙，所以冇乜時間入馬場，唔知係咪同李寧集團近日積極開拓兒童用品系列有關呢？不過佢話，幾忙都好，都要抽時間陪吓家人，所以帶仔女嚟湊下熱鬧。雖然「桂花飄香」最後只係得第三，輸咗畀莎莎老闆娘郭羅桂珍匹靚駒「美的人生」，李寧笑笑口話，攞第幾冇所謂，最緊要大家開心啫！
陳振邦大讚囝囝腳頭好
今年一月榮升爸爸嘅李小鵬話，自己剛剛喺美國返港，因為佢太太安琪係美籍華僑，BB女喺美國出世。佢甜絲絲咁話，太太已幫囡囡改咗英文名Olivia，但就冇透露中文名。李小鵬現時喺李寧旗下嘅「非凡中國」工作，佢話要經常中港兩邊走，又要湊B，所以都少咗做運動。雖然係咁，佢依然好關心體壇發展，仲計劃今年倫敦奧運會結束後，帶領中國體操隊來港表演跳水同體操，到時大家有眼福喇！
講番郭太匹「美的人生」，原來係首次奪冠，郭太喜上眉梢，同老公郭少明、女婿陳振邦（Davis）及一班老友齊拉頭馬，至於愛女郭詩慧啱啱誕下龍仔要坐月冇入馬場。Davis大讚囝囝腳頭好，仲向卓妮展示B仔相，話囝囝前日突然單眼chok樣，成個「sure win」表情，估唔到過兩日就拉頭馬，真係好事成雙。
卓妮