禍不單行 郭家頭痕
號稱網絡極為穩定的數碼通母公司新鴻基地產正值多事之秋，公司聯席主席郭炳江和郭炳聯遭廉政公署調查，兩兄弟正「頭痕」之際，豈料昨又爆出數碼通「機樓down機」事件，全城「插爆」︰「又話一切正常，唔會影響旗下業務……」
郭炳江和郭炳聯被廉署拘捕調查後，上周聯同公司管理層召開記者會，郭氏兄弟當日信誓旦旦稱︰「新地一切正常，是次事件不會影響公司日常運作。」言猶在耳，號稱網絡最強、最穩定的數碼通其中一座機樓昨日早上發生電力故障，港九新界多個地區網絡服務受阻，客戶服務熱線亦「毫無反應」，遭全城插爆，譏諷數碼通「垃圾」。
網民索償 「咪以為我哋好恰」
有精明網民昨早親身到旺角數碼通門市投訴，獲得回應只有「機樓down咗」，並無提及任何補償，在現場查詢及投訴的用戶登時鼓譟。有網民在討論區留言要求數碼通合理的賠償，否則一定會控告至通訊管理局，追究其責任，亦有網民諷刺︰「好多人每個月都交足電話費，交咗錢畀佢就好似過咗海係神仙，咪以為我哋好恰！」
本報記者