政情：陶君行自爆當街小便
早前名店禁攝事件、北京大學教授孔慶東嘅「狗噏論」、雙非孕婦問題等，令中港矛盾日深。社民連陶君行就話，大家對內地同胞好矛盾，事關「六四」嗰陣大家就話要有使命、要推動中國民主，點解依家又唔能夠包容啲同胞呢？佢仲覺得港人影低啲同胞周街小便、踎喺地下嘅行為好反智，仲自爆話：「當街屙尿我都有！」聽到真係嚇親。
身為華人民主學院司庫嘅陶君行，尋日出席學院喺城市大學舉行嘅論壇，講到點解部分市民對內地人反感時，佢就話呢種情緒係源於對內地暴發戶嘅妒忌，以及對內地人攞香港福利嘅不滿。佢仲疑似為內地人平反，話其實啲內地人周街小便、踎喺地下都無乜大不了，因為佢都試過當街小便，但只係飲醉酒急住去廁所嗰陣喎，唔怪得佢話港人影低內地人行為係反智喇。