用咗接近二億元興建嘅鄉議局新大樓睇落都幾宏偉，內部裝修亦叫做美輪美奐，但由於該局九龍塘舊局址仲未賣得出，搞到依家仲欠緊銀行幾千萬元債項。呢頭撲緊水，嗰頭又收到壞消息，就係有份捐助新大樓嘅香港賽馬會，指新大樓演奏廳嘅音響設備太過奢華，搞到有關一千二百萬元嘅捐款暫時唔可以支付畀鄉議局。
馬會本身係非牟利組織，每年慈善捐款不計其數，但每筆捐款都有規有矩。今次之所以出問題，全因為鄉議局為新大樓演奏廳裝設咗一套一千多萬元嘅專業音響，馬會認為唔係必須項目，超出資助範圍，所以咪撞板囉。
不過，馬會答應得捐款畀鄉議局，就唔會走數嘅，只要有關開支項目屬必須項目，好似一啲軟件項目，包括展覽同導賞咁，馬會都答應會資助。另外，為提高大樓使用量，鄉議局已致函多個團體同舞蹈學校，邀請佢哋租用大樓，都算係識得開源，唔係人哋捐錢出雞，該局出豉油都點乾啦！