政情：貪曾曲線幫CY助選

方敏生尋日喺電台節目上，指名道姓鬧煲呔曾「一直視社會福利為負累，寧可派錢也不願作出長遠服務規劃和承擔」，仲話特首選舉期間，夕陽政府被批扶貧不力嘅指控「並非子虛烏有」。佢坦言，做好滅貧工作同解決服務不足，唔等於搞福利主義，只係基本嘅民生服務，特首必須做好。只可惜煲呔曾任內貪盡大小便宜，懶理升斗市民為基本生活奔波同困擾。

政策傾斜 衰到貼地

除咗方敏生外，何喜華都憤言對現屆政府「極度失望」。何喜華眼見夕陽政府坐擁巨額財政儲備，但對於籠屋、劏房呢啲問題視而不見、聽而不聞非常扯火，尤其係夕陽政府完全唔肯聽人意見，好似啲公營房屋政策照顧唔到低下階層，但為咗平息民怨又走去派錢，做法根本就係傾斜。佢又批評政府無妥善土地規劃，令中產難以置業，總之一句講晒，就係煲呔曾無能。

可能大家會奇怪點解何喜華一直力挺CY，尋日佢剖白話，一來就係因為對煲呔曾死心，二來係認同CY嘅「穩中求變」理念。真係古語有云：哀莫大於心死，如果唔係煲呔曾政府衰到貼地，可能佢都唔會挺梁，換言之CY之所以得到部分社福界支持，第一個真係要多謝煲呔曾；又或者可以話，唔鍾意CY嘅煲呔曾，其實曲線幫咗CY而不自知。