中環出更：王淑筠幫襯自己買復活蛋
香港青年聯會賢慧社最近有位靚女新面孔，佢就係美億珠寶嘅太子女王淑筠（Diana）。復活節長假期間，卓妮行經尖沙咀海港城，咁啱見到Diana帶住三歲囡囡Ashley，喺意大利朱古力Venchi分店買復活蛋，原來佢係Venchi嘅香港代理商，落足心思打造童話式店舖，難怪咁受城中朱古力迷歡迎。
Diana話，幾年前佢去意大利參加珠寶展，因緣際會食到有一百三十幾年歷史嘅Venchi朱古力，自此即愛上，佢最鍾意榛子及黑朱古力味。後來佢花兩年時間取得香港代理權，初時只做批發，供應畀星級酒店及餐廳，直至年半前先至開第一間門市，一年生意額已高達數千萬元。
今年二月至加入青聯嘅Diana，覺得一班兄弟姐妹既能幹，又有服務社會嘅熱誠，好值得佢學習。唔講唔知，原來Diana媽媽同「提升快樂指數基金」發起人之一嘅寶星首飾廠老闆吳宏斌相識多年，佢就跟隨世伯齊齊傳送快樂，仲鼓勵員工加入基金做義工添！