中環出更：武癡王嘉恩「打」入全球十大
名人圈臥虎藏龍，不乏武林高手。前博愛總理兼東源大地物流公司老闆王嘉恩（Albert）原來係「武癡」，佢十多年來不斷珍藏中外兵器，近日就獲外國雜誌選為「全球十大有趣人物」之一。
小時候嘅Albert，雖然肥嘟嘟但多病，留學加國時，常被外籍同學欺負，於是下定決心習武自衞，點知一學就上癮。佢先後練過柔道、空手道、居合道、伊賀忍術、少林氣功，仲有道家氣功，集各家大成。
學武自然接觸兵器，Albert十多年前愛上收藏兵器，穿梭大小古董店，搜羅日本刀、中國刀，就連飛鏢、鐮刀都唔放過。部分古董刀因出自名家，近年被熱炒，短短五年間，已升值十多萬港元。
拒收「二手刀」怕暗藏殺氣
不過，有一款刀係Albert拒收嘅，就係「二手刀」，怕啲刀來歷不明，暗藏殺氣，所以佢只珍藏新刀。佢又試過搵專人製作仿古刀，好似武俠小說中嘅「倚天劍」，佢都有一把。近年佢認識一些製片人，拍過電影嘅刀劍，亦收歸旗下。
呢股武術熱誠，早前被一本外國雜誌睇中，派員來港追訪佢。拍照當日，Albert換上唐裝，將歷年來珍藏嘅寶刀一次過傾巢而出，仲即場露兩手示範舞劍同放飛鏢，令外籍攝影師嘆為觀止。雖然訪問過程拍足六小時，但Albert話樂此不疲：「能將武術精神帶到全世界，好自豪！」
卓妮