有頭髮冇人想做瘌痢，有雙腳冇人想坐輪椅。殘疾人士好慘㗎，雖然輪椅嚴格嚟講都係一種「交通工具」，但係你冇可能利用輪椅一路由天水圍轆到去尖沙咀啫。即係咁，坐輪椅嘅殘疾人士需要另一種交通工具先至可以路路暢通，否則活動範圍將會非常狹窄，窄到隨時冇晒朋友斷埋六親。
傷殘人士需要乜嘢交通工具呢？答案係專門應付輪椅上上落落嘅復康巴士，勞工及福利局每年資助香港復康會四千幾萬元提供復康巴士服務，而運輸署就負責購買復康巴士並且監察服務情況。家陣全港有大約一百一十部復康巴士服務殘疾人士以及公公婆婆，其中固定路線用於繁忙時間接載上班、上學以及前往接受康復治療，而電話預約服務就方便覆診同參與社交活動。
好嘞，勞福局嘅資助夠唔夠呢？運輸署嘅監察又足唔足呢？不如咁講啦，若然呢一個曾蔭權率領嘅特區政府真係誠心誠意做好呢份工，香港都唔會成為怨聲載道嘅示威之都。簡單咁講，殘疾人士名副其實行動不便，有輪椅都無法出遠門，事關復康巴士嚴重不足！
根據運輸署數字顯示，復康巴士嘅固定路線服務每年有超過五十人輪候，平均輪候時間兩個月。至於電話預約服務咯喎，過去四年平均每年接獲超過十二萬個申請，「拒載」數字逐年遞增，由○八年一萬宗飆升至去年共一萬六千幾宗。
呢嗱嗱嗱，一講到拒載大家可能好大反應，畢竟人人都搭過的士，而且必定受過拒載嘅冤屈氣。趕時間遇上的士拒載，你大概會激到有衝動爆粗。肩負神聖任務嘅復康巴士居然都拒載，你叫殘疾人士點算好呢？電話預約服務嚴重不足到一個程度，往往要提前兩三個月落柯打先至有機會如期上車。喂，今日唔知聽日事，殘疾人士出一次門竟然要兩三個月前吹雞落實，好唔合理啫！
冇錯，運輸署今年將會增購六架復康巴士應付需求，之不過咁，預計只可以減少四分之一被拒申請。換言之，仍然會有數以千計申請者受到拒載嘅苛待，簡直激到人哋嘔血啦。好人好姐不幸地遇到的士拒載，就話可以改搭其他交通工具啫，輪椅一族搭唔到復康巴士，可以點做呢？你知啦，香港嘅無障礙設施又唔係特別方便，一級樓梯就足以令到殘疾人士「走投無路」。若然勞福局同運輸署唔諗辦法增加復康巴士服務，等於殘酷對待殘疾人士，好冇品啫！
話時話，如果貪曾隻腳跛咗，等佢變成輪椅一族咯喎，復康巴士好大機會馬上提供超額服務！