特首選舉結果塵埃落定，但梁營同唐營雙方要「大和解」殊不容易。
提名唐英年參選特首嘅自由黨副主席周梁淑怡（莎姐）同梁營前競選辦主席張震遠，尋日前後腳出席電台節目，主持人諗住邀請莎姐留低同張震遠傾幾句，但莎姐思量數秒後就話約咗個孫，未有應承留低，即使主持人死纏爛打，莎姐都以守時為由，話下次先至再傾喎。
莎姐喺行動上未有表現「大和解」，言語間講起CY亦好有微言。莎姐話，佢對候任特首梁振英（CY）首個印象係「好密實」，唔係一個好易同人哋好friend嘅人，又爆料話雙方認識多年至今都無試過單對單食飯傾偈，語畢又突然搵CY算帳，話對方曾經喺特首選舉提名期前應承請佢食飯，但結果最後都無請到喎。
當問到會否擔心自由黨會被「大報仇」時，莎姐話唔怕被投閒置散，語帶輕鬆話萬一不幸被秋後算帳，嗰條隊都好長喎，又話聰明嘅特首應該唔會以報仇作為準則。