政情：村屋僭建 劉夢熊倡特赦
新界村屋僭建清拆問題令一眾鄉紳同政府嘅關係勢如水火，喺發展局局長林鄭月娥強硬執法下，到時都唔知點收科。正喺呢個膠着狀態下，早前因為「流浮山鄉事飯局」同班鄉紳搞到面左左嘅全國政協委員劉夢熊，尋日忽然挺身力撐村屋僭建。劉夢熊建議政府特赦結構安全嘅村屋僭建，透過補地價理順僭建，佢話：「唔係話有錢大晒，而係要付出相應代價！」
劉夢熊話，林鄭太過「書生氣」，強調如果政府強行清拆村屋僭建只會淪為「流血事件」。佢就諗咗一個法理情兼備嘅特赦僭建方案，就係擇個日子劃線，喺嗰日之後，所有僭建一吋都唔准再起。至於結構安全嘅僭建，就透過補地價繼續存在，但有即時危險嘅僭建就必須取締喎。今日佢會同各鄉紳食飯商討，身兼策略發展委員會委員嘅佢，稍後就會向策發會提交報告。林鄭一向堅持村屋僭建唔會有特赦，如今劉夢熊提出嘅特赦方案，完全同林鄭唱反調，究竟葫蘆裏賣咩藥，相信遲啲自有分曉。