傳媒業經營愈來愈艱難，尤其係多媒體。台灣暢銷雜誌《新新聞》最新一期爆料話，蘋果肥佬黎旗下嘅台灣壹電視去年七月先至攞到牌照，但近期因為持續虧損，肥佬黎已委託投資銀行搵買家，打算變賣家產止蝕。報道話，肥佬黎叫價五億美元（約三十九億港元），但五億美元究竟淨係賣壹電視，定係台灣蘋果日報及壹週刊一齊打包出售，就眾說紛紜。
《新新聞》話，壹電視從籌備至今，估計肥佬黎已經燃燒咗四十億新台幣（約十億五千萬港元），開播後更令到原本賺錢嘅壹傳媒轉盈為虧，壹電視已成為肥佬黎最沉重嘅負擔。報道又話，中介人搵到好有興趣投資媒體嘅台灣財團富邦金控，叫價雖由高過五億美元一路退讓，但富邦董事長蔡明忠都係謝絕呢宗買賣。
報道又話，受託嘅投資銀行繼續搵嘅新目標買家，包括潤泰集團、中時集團及台灣富豪郭台銘嘅細佬正崴集團郭台強等。肥佬黎為滿足個人野心，大灑金錢進軍電視業，結果未夠一年就變賣家產而敗走台灣，早知今日，又何必當初呢？