政情：出戰新東 葛珮帆恐撻Q

本身係現任新界西立法會議員嘅張學明，九月肯定唔會喺新界西競逐連任，原本佢有機會代表鄉事派轉戰新界東搏殺，但有消息話，反而有民建聯中人希望佢代表該黨去新界東出選，一來佢鄉事背景夠厚，加上又係新界社團聯會榮譽會長，如果由佢出山，攞一席絕對無問題。

情況混亂　民記怕兩席變一席

不過，如果學明真係代表民建聯喺新界東出戰嘅話，咁最受影響就肯定係EQ喇。該黨內部一直盛傳，黨內部早就答應EQ可以擔大旗出選，只係大家有見新界東選情愈來愈混亂，人人都想自行派隊參選嘅情況下，擔心EQ唔夠力同其他建制派對手爭票，最終搞到該黨喺新界東兩席變一席，咁就認真大件事喇。

EQ能否出選仲係未知之數，但該黨「票王」劉國勳已萬事俱備參選。據講，該黨北區眾人都好支持劉國勳出選，無他嘅，該黨新界東議席長期畀來自沙田嘅人壟斷，北區人士梗係想有出頭天啦！劉國勳早前高調支持梁振英選特首，先後多次為梁安排地區活動，間接令自己曝光率同知名度提高，你話佢無野心參選，講都無人信啦！

除咗民建聯內部外，原來一直擔任佢哋樁腳嘅沙田地區組織公民力量亦醞釀出選，本月中仲會開會決定是否同另一有意出選嘅沙田區議員龐愛蘭聯合參選，據聞成數都唔細，但細節未傾掂，若果成事嘅話，民建聯得票肯定又少咗，喺四面受敵困境下，話EQ隨時變撻Q就係咁解喇。