清明時節雨紛紛，難得尋日天公作美，清風送爽，孝子賢孫掃墓祭祖唔使咁狼狽、咁辛苦，「路上行人欲斷魂」嘅淒酸情景都可以少番啲。
講開清明節，中國人一向重視慎終追遠，最怕失禮死人，所以年年春秋二祭，掃墓人潮都絡繹不絕。不過，畢竟時代不同咯，今時今日安葬先人，入土為安已經成為一種奢求，海葬可能更加實際，更加安樂，更加一了百了。
嗱，食環署數字顯示，近年採取海葬嘅市民愈來愈多，由○七年嘅一百六十宗，到上年激增四倍至六百六十宗。可能係先人顯靈，食環署官僚平時又懶又鈍，哈，今次出奇地咁機靈喎，食住條水上，除咗提供免費大型渡輪接載孝子賢孫之外，仲引入埋專業禮儀師服務，令海葬儀式更添莊嚴。
其實，誠心處理先人後事，為嘅係表達孝心，形式應該不拘一格，尤其對地少人多嘅香港嚟講，海葬不失為一個唔錯嘅選擇。大家都知啦，港府政策一塌糊塗，骨灰龕長期供不應求，港人往生之後隨時要做三五七年遊魂野鬼，橫掂死無葬身之地，不如魂歸大海，自由自在，無謂死咗仲要受港府嘅無能施政折磨吖。
所以話，食環署大力發展海葬，其實係為骨灰龕政策失敗補鑊。點都好啦，總之生養死葬係基本人權，入土為安又好，情歸大海又好，港府都責無旁貸，怕只怕，以港產官僚甩甩漏漏嘅施政作風，骨灰龕固然搞唔掂，海葬一樣搞到亂晒大龍，咁就失禮死人！
功夫茶唔係杞人憂天，海葬烏龍百出係有迹可尋㗎。上年本報獨家踢爆，食環署安排嘅海葬服務亂象多多，渡輪居然未到指定地點，求其就喺鄰近養殖魚排違規撒骨灰。魚食骨灰人食魚，咁搞法，骨灰龕一位難求，「骨灰魚」就隨時日日有得食！
仲有，漁民團體投訴，當局推行海葬之後，捕魚時成日網到疑似骨灰龕物體，有漁民甚至一次過撈到四、五十個骨灰龕，真係大吉利是。當局原來無監無管，海葬亂象亂過亂葬崗，市民見到都怕怕啦，仲邊有人敢做不孝子孫？
唉，話時話，「清明」呢兩個字早喺香港官場消失咗咯，身為港府一哥嘅曾蔭權居然爆出連串貪腐醜聞，負責市民「生老病死」政策嘅食物及衞生局局長周一嶽又顢頇無能，搞到先人無法安息，死咗都隨時被激到翻生。
一句講晒，龕位不足有海葬，最怕庸官攪亂檔。港府官僚要發展海葬，唔該就做好啲，咪又敷衍塞責，愚弄先人呀！