政情：何兆煒樂做院長 唔諗回巢
前醫管局行政總裁何兆煒，二月初過檔聖保祿醫院做院長「一哥」之後，愈忙愈開心，佢日前現身東華三院董事局嘅就職晚宴，笑容多咗而且又風騷咗，難得重遇一班醫學界好朋友，全程傾到雞啄唔斷。
何兆煒話，佢份院長新工做得好開心，好有滿足感，近日更忙於搞醫院重建。咁又係嘅，打工除咗份人工外，其次係要做得開心，否則都好難捱。
何兆煒係醫院管理局前行政總裁，喺○五年離開，咁啱醫管局主席一職到年底就屆滿，如果有機會嘅話，唔知佢有無意思重返醫管局呢？何兆煒隨即耍手擰頭，又話無人搵過佢喎。
有傳話何兆煒做院長嘅年薪最少有二百幾萬，雖然未必及得上醫管局份糧，但估計工作會無咁大壓力，都係開心最緊要。