政情：紀文鳳撐CY 被笑「嘥時間」
梁振英（ＣＹ）成為候任特首後，之前幫佢做競選工程嘅班底亦相繼接受傳媒訪問，尋日輪到競選辦副主任紀文鳳接受電台訪問。雖然紀文鳳貴為新世界發展嘅高層，但當初佢對特首人選睇法就同老闆鄭家純（純官）好唔同，仲自爆話曾經畀純官話佢支持ＣＹ係嘥時間添！
紀文鳳話，九十年代初已經認識ＣＹ，亦早已覺得ＣＹ會做特首，取態同老闆純官確實不同，記得去年十月決定加入ＣＹ競選辦時，就曾經畀純官笑佢咁做只係「嘥時間」。不過，特首選舉最終由ＣＹ勝出，紀文鳳就主動邀請提名唐英年嘅純官一齊為ＣＹ站台，以示團結各界。
批曾蔭權心術不正
紀文鳳又爆料，話ＣＹ爭取佛教界選委投票支持時，就告知選委之一嘅覺光法師，話自己亦引用對方「行之正道」嘅概念做競選口號，最終佛教界有九個選委投票支持ＣＹ。佢又批評，煲呔曾接受富豪海陸空款待嘅行為絕對唔係「行之正道」，而係「心術不正」，簡直一矢中的，實在大快人心。