政情：KK失鐵票 連任九東難
工聯會一直希望喺九月立法會選舉大展拳腳，會長鄭耀棠早喺一年前已經大打開口牌，話要搞個風車戰陣出嚟，即係由「票后」陳婉嫻做軸心選超級區議會，再喺全港五大區派人參加直選，但呢個如意算盤最近有啲阻滯。消息人士透露，工聯會現任九龍東立法會議員黃國健（KK）嘅勝算危危乎，全因工聯會要被迫過票畀空降九龍東參選嘅旅遊界議員謝偉俊（Paul）。
KK做咗立法會議員三年幾，表現尚算平穩，平日問政嘅風格同言論都受到傳媒注意，照計無理由有危機，但據聞工聯會最近計過數，發現KK手上嘅鐵票，計極都唔足以令佢成功連任。結果一出，工聯會高層都大為驚訝，近日已經開始密密斟，研究點樣保住KK個議席。
非戰之罪 棠哥出面力保
KK嘅選情搞到咁尷尬，其實係「非戰之罪」，消息人士話，工聯會同民建聯早前已經收到指示要過票畀阿Paul。我哋之前已經講過，阿Paul去年因為喺外傭居港權一事上打擊公民黨有功，加上本身嘅律師專業背景，結果受到賞識，獲全力支持出戰九龍東直選，務求搶埋新增嘅第五個議席。
原本條數計落好圓滿，但要打破立法會選舉嘅泛民主派對建制派嘅「六四定律」又談何容易？原來一直支持工聯會、同陳婉嫻極度友好嘅東九龍居民委員會嘅鐵票已經被撥歸阿Paul，該會喺九龍東甚有影響力，動員力又強，可以話係鐵票中嘅鐵票，加埋觀塘區部分獨立區議員已經被安排去支持阿Paul，工聯會冇咗呢批選票，選情即時變得唔樂觀。
據聞地區人士對呢個情況都頗有微言，質疑點解愛國愛港嘅工聯會遭受如此對待。消息人士仲話，棠哥近日不斷同有關方面說項，務求力保KK。依家工聯會無嘢驚，最怕西環唔開綠燈，而班街坊會員又太過老定唔去投票，搞到KK輸咗就大件事喇。