中環出更：黃蘭心揀布 幫囝囝做戲服
卓妮日前行過布行林立嘅中環利源西街，見到曾經獲獎無數嘅港產年輕設計師黃蘭心（Connie），原來佢係為咗去搵布料，為三歲囝囝親手度身訂造復活節唱遊活動嘅戲服。
Connie話，好鍾意設計童裝及戲服，事關冇太多規條，可以平衡吓時裝設計工作，過吓設計癮喎！
Connie畢業於理工大學，曾經獲選為香港十大傑出青年設計師，係業界公認嘅才女。Connie喺慕詩（Moiselle）做過設計師，七年前被前政務司廖本懷嘅新抱朱承坤（Joanna）網羅，出任旗下嘅時裝品牌「JO'S ready-to-wear」嘅設計師至今。
傑出設計師 着衫低調
Connie心中始終有鋪設計癮，最近佢就為一齣電影重新設計四套戲服，擺放喺德福商場展覽，掀起城中白雪公主迷嘅狂熱。雖然佢鍾意玩天馬行空設計，但自己着衫就好低調，笑言衣櫃內只得黑、白、藍三種顏色。
卓妮