中環出更：青聯惠貧童 帶遊海洋公園
香港青聯賢慧社主席羅詠詩（Anthea）、副主席林玉茵等三十幾位靚女們，日前喺灣仔嘅會所餐廳浙江軒歡聚，為返港探親嘅青聯副主席彭芷君（Gigi）餞行，青聯主席葉振都、副主席朱鼎健等大男人都嚟趁熱鬧。兄弟姐妹們難得齊聚，離別依依嘅Gigi話，日內就會再返港力撐「青聯賢慧愛家日」活動，同一千五百名低收入兒童及家長暢遊海洋公園。
Anthea對愛家日嘅活動好着緊，當晚報告最新進展，佢多謝好姊妹羅頌宜（Bella）居中牽線，三年前賢慧社先至獲得海洋公園慷慨贊助二百張特價門票，畀佢哋免費招待低收入家庭兒童去暢遊。Bella係「中國罐王」永富容器老闆羅富昌嘅寶貝女兒，佢亦係蘭桂芳地產集團中國市場推廣總監。Bella話，日日都見到海洋公園主席盛智文，於是開聲促成件美事。
戴夢瑩復活節開工作坊
青聯旗下香港國學中心主席、前青聯主席許華傑嘅太太戴夢瑩都在場。原來許太係台灣人，佢話嚟緊復活節將開設工作坊，請北京名師王悅來港傳授中國文化及智慧。
講起請國學大師來港授課，許太就好勞氣，事關入境處堅持要提供名師嘅證書或資歷才可入境，但係國學造諧並無認證系統，官員嘅要求偏離現實，令好多國學大師無法來港，認真激氣。
卓妮