大年初三，赤口之日，大家記唔記得當日邊個撩交嗌，而且最多人鬧到佢趴街？如果記憶力有少少模糊，咁就等功夫茶提供少少貼士，呢一個相嗌唔好口嘅赤口之王，英文名叫做Ngon Ping Sam Luk Ling。
講到咁白嘞，唔使點估啦。今年一月二十五日農曆大年初三，昂坪360纜車再一次發生故障，接近八百名旅客被迫受困差不多兩粒鐘，當時氣溫低到個個手騰腳震呀，冇陰功！
待客不周嘅纜車公司被鬧到狗血淋頭，纜車服務即時叫停。你知啦，事故不斷嘅昂坪360除咗鍾意將乘客半天吊之外，更加試過喺○七年六月無端端跌咗一個車廂落山，史稱「六月飛廂」，萬一悲劇重演點算呀。所以呢，停止服務檢查維修係應該嘅，搞出人命就唔好啦。
事隔兩個幾月，檢查維修成點呢又？機電工程署話喎，已經完成事故調查，確定所需改善措施妥善落實，因此同意重開纜車，趕得切復活節假期做生意。調查報告係咁講嘅，事故係由於纜車系統四號牽引纜滑輪嘅軸承內環滾動面出現不規則損蝕，加上四號牽引纜滑輪膠邊不均勻磨損，導致牽引纜出現震動，繼而觸動滑輪位置感應器停止纜車運作。肇事牽引纜滑輪軸承內嘅潤滑油經進一步檢驗，顯示當中含有相對較高嘅水分，降低潤滑效能引致軸承損蝕。報告指出，為免同類事故再次發生，昂坪360重開纜車設施之前，必須落實多項改善措施。
至於改善措施到底係乜乜東東，請恕功夫茶唔引述嘞，因為非常技術性，恐怕大家睇到瞌眼瞓。總而言之，機電工程署嘅報告基本上講出一個事實，原來纜車公司之前嘅運作模式十分唔妥善，咁先至有必要多管齊下改善改善。
唉，昂坪360開張咁耐就衰咁耐，一時話故障，一時話停駛，唔使問阿桂都知道係管理不善造成嘅惡果啦，罪魁禍首係管理層。情況就好似特區政府，如果唔係曾蔭權其身不正掛住歎盡海陸空，下面又點會有咁多庸碌無能嘅失職官僚搞到香港亂七八糟呢？家陣連前任政務司司長許仕仁都要去廉署飲咖啡，證明成副政府機器都處於半天吊狀態。
計功夫茶話齋，今次纜車重開唔代表長治久安，若然管理層繼續敷衍塞責，唔知幾時又會整一煲杰撻撻。維持纜車正常運作係唔可以有一日鬆懈o架，出事之後補鑊就太遲啦。即係咁，唔想乘客半天吊，管理不可吊吊揈。如果日後再有乜嘢三長兩短，功夫茶強烈建議，除咗更換零件，亦要更換腦袋，即刻撤換管理層！