政情：黃灝玄快閃揼低女助手
候任特首梁振英（CY）嘅管治班子備受各界關注，尋日商務及經濟發展局常任秘書長黃灝玄突然現身候任特首辦，即刻令人聯想係咪獲邀加入新班子，甚至更上一層樓脫離公務員架構成為局長。黃灝玄會後冇回應傳媒任何提問，離開時為咗速逃竟然丟低女助手，認真耐人尋味。
CY連日來會見社會各界人士，本來大家都習以為常，但尋日突然出現咗一個公務員，佢就係黃灝玄。話說尋日早上約十點半，黃灝玄突然到候任特首辦同CY見面，大約見咗個多小時後離開，但對於傳媒提問十問九唔應，臨上車前向身邊女助手拋下一句「Carol，你自己返去。」翻查資料先發現呢位洋名叫Carol嘅女助手係工貿署副署長袁小惠，事後亦有人話呢個只係工作會議。
話時話，黃灝玄同CY見面後速逃非首次，之前CY同政務主任協會代表會面時，有份出席嘅黃灝玄都係冇答任何提問就走咗，令人對CY短時間內兩次會見黃灝玄，引起聯想。