政情：李慧琼復活蛋谷肥囡囡
為人父母最關心嘅就係仔女嘅健康，原來立法會議員李慧琼（Starry）個囡囡就有偏食嘅習慣。一般小朋友都係鍾意食啲煎炸嘢，但係佢囡囡就與眾不同，最鍾意食壽司，原本壽司都係健康食品，但最弊係佢囡囡淨係食舊飯，營養唔夠下自然偏瘦。Starry於是特登喺英國買咗成呎高嘅朱古力復活蛋送畀囡囡，希望可以食肥啲，促進發育喎。
話說Starry上月因為公幹去咗英國，佢喺當地見到啲色彩繽紛嘅朱古力復活蛋，就即刻諗起令佢牽腸掛肚嘅囡囡，於是就買咗三隻做復活節禮物，其中一隻仲成呎高添，目的都係想谷肥囡囡。Starry仲設計埋「谷肥餐單」，包括要囡囡早晚飲牛奶、食芝士咁話，做阿媽真係用心良苦囉。咁食法，希望Starry囡囡真係可以快高長大啦！
