政情：陳達文係文化局之父？
香港成日被譏為文化沙漠，候任特首梁振英（CY）競選時就提出成立文化局，唔知能否將香港變做文化綠洲呢？做過文化署署長、又擔任過香港藝術發展局主席嘅陳達文日前出席一個活動時，就提議CY應該推動多啲Ｈ股公司資助文化節目，好似外資咁每年預留一筆錢推動文化，一來有助香港文化界發展，二來亦對提供贊助嘅公司有利，達致雙贏局面。
陳達文語重心長話，依家政府有錢，投放多啲落文化實無死，事關搞文化唔使好多錢，少少已經令業界好開心，而且搞文化一定無人反對。佢又透露，實情CY提出成立文化局都係聽咗佢嘅提議，事關佢認為現時民政事務局同康文署一齊負責文化事務，太過疊床架屋喇，不如好似以前教育署同教統局咁，局署合併仲好喎。佢仲話，總之將來無論邊個做文化局局長，佢都好期待同呢位局長見面。