政情：《爽報》宣淫 白鴿唔敢譴責

《爽報》宣淫惹起社會強烈不滿，立法會曾經喺二月中召開聯席會議討論，出席嘅大部分團體都連珠炮發譴責《爽報》宣淫，唯獨係曾經被踢爆收過淫賤黎千幾萬嘅白鴿黨，其代表議員全程「齋坐」冇出過聲。事隔一個多月後，白鴿黨終於出手做嘢，就係向教育事務委員會主席提交意見書。原本以為該黨知錯能改，同淫賤黎劃清界線，但原來只係賊過興兵、整色整水。

意見書冇議員肯署名

該黨整份意見書僅以「關注《爽報》的色情內容」為題，連譴責字眼都唔敢用，其次係意見書嘅行文內容避重就輕，對大肆鞭撻《爽報》惜字如金，仲提醒當局唔好以打擊不雅內容為藉口而對新聞自由進行干預，企圖借新聞自由來包庇宣淫。不過，最離譜嘅係，份意見書個署名只有白鴿黨，竟然黨內無一個議員敢署名直斥《爽報》不是，好明顯睇得出佢哋嘅不情不願。

白鴿黨份意見書唯一可取嘅，就係該黨認為當局無盡力檢控《爽報》，即變相縱容此類不雅刊物向青少年發布，係執法嘅疏忽同缺失；又促請政府加強適當罰則，以收阻嚇作用。不過，睇嘢要睇闊啲，閱覽整份意見書，明眼人一睇就知白鴿黨另有所圖，咁遲先至提交意見書睇怕都係整色整水，咪為咗九月立法會選舉囉，諗住向家長同教育界嘅選民有個交代，避免選票流失，但心水清嘅選民又點會咁易畀佢呃到吖！