中環出更：泰儲妃Shopping大陣仗惹騷動
泰國儲妃西拉斯美（SRIRASMI MAHIDOL）同囝囝近日來港度假一個多星期，橫掃各大熱門旅遊區。卓妮前日下午四點半鐘，就目擊一身休閒打扮嘅儲妃，現身名店林立嘅中環ifc商場，同行仲有十幾個保鏢同工作人員築成人牆，將佢重重包圍，排場強勁，令成個本來寧靜嘅商場引起一陣小騷動。
當日泰儲妃着住黑白橫間上衫，配黑色長紗裙，踢住對充滿泰式風味嘅花花人字拖涼鞋，簡樸中見清麗，喺ifc商場內嘅大型連鎖店購物。王族出巡，隨行一班保鏢同工作人員嘅警覺性好高，一見有記者舉機拍攝，立即用盡方法遮擋鏡頭，用完手又用袋，有人仲掏出iPhone反拍添！其實咁勁嘅排場，都好難唔惹人注目啦！
擾攘咗十五分鐘後，心情靚爆嘅儲妃步出連鎖店，但睇嚟仲未夠喉，隨即轉場到美國名店Juicy Couture繼續掃貨。
隨行人員掛王子襟章
卓妮留意到全部隨行人員嘅衣物上，都扣住疑似儲妃愛兒樣貌嘅襟章，而且個個都係唔同款嘅，又幾有特色喎，莫非係用來識別工作人員嘅身份？抑或萬一小王子走失時用來認人呢？