政情：高永文享受人生唔做官
一早歸邊做咗「梁粉（梁振英支持者）」嘅骨科名醫高永文，仕途近日看漲，盛傳佢「翻兜」入政府機會高。不過高醫生開腔表心迹，話無意重返官場：「我性格唔啱做醫療改革，要我炒人、整頓部門，真係落唔到手。」佢強調自己早就做過，如今最想享受人生，閒來約三五知己品嘗潮菜，做官咁大責任，都係留畀有能之士喇！
高永文尋日同我哋講，話重新執手術刀後，不知幾enjoy（享受），畀佢揀，寧願堅持現狀，等佢以自由身繼續做「社會大義工」。佢數數嚟緊幾個月行程，五月將跟隨潮州青委到訪潮州；六月去台灣拜訪慈濟基金會創辦人證嚴法師；七月去四川義診，然後仲要遊覽川北藏族自治區觀雀；十月再跟「苗圃行動」去雲南，聽落仲忙過做大官。