政情：黃玉山係教改幕後黑手？
有傳支持梁振英嘅港區人大代表黃玉山有望出任教育局局長，但隨即引起業界回響，質疑佢當年有份同時任教統局常秘嘅羅范椒芬一同推動教改，搞到班教師叫苦連天。尋日現任教育局常秘謝凌潔貞仲失驚無神爆料，指證黃玉山係文憑試嘅「幕後黑手」，唔通佢唔想黃玉山做佢未來老細？
由香港學者協會舉辦嘅「香江學者計劃」尋日舉行啟動禮，黃玉山同謝凌潔貞都有份做主禮嘉賓。原本唔打算致辭嘅謝太忽然爆料，話黃玉山係文憑試嘅「幕後黑手」，因為佢當年係課程發展議會主席，有份制訂新高中課程。
謝太原意係想讚賞黃玉山嘅，但畀啲本地教師、學生同家長聽到，卻係另一番感受。會後問佢係咪支持黃玉山做教育局局長，謝太即刻學番精咗，以自己係公務員為由拒絕表態。
至於被指係教改黑手嘅黃玉山，亦三番四次話出任局長只係一個傳說，但同時強調自己當年做課程發展議會主席，多數係同業界合作，反而同羅范椒芬交往好少喎，疑似想同羅太劃清界線！