政情：CY好Cool要改形象
繼煲呔曾被揭發接受富豪提供海陸空款待後，人稱「肥龍」嘅前政務司司長許仕仁亦捲入涉貪大風暴，大家都期望梁振英（CY）上場後可以新人事新作風，一改政府貪腐形象。幾個CY嘅老朋友就話對CY有信心，但異口同聲認為CY要改吓形象，唔好咁cool（冷酷），要多啲真情流露咁話。同CY識咗廿幾年嘅全國政協委員蔣麗芸（Ann）就大爆CY人性化嘅一面。
CY成日畀人又話佢「狼」、又話佢奸，同CY相識咗四十五年、當年係中學同學嘅民主黨羅致光就澄清話，其實CY唔係「奸仔」，同學對佢印象都幾好，去年中學同學聚會仲變成「挺梁大會」添。佢又話，大家話CY奸，其實係大家睇佢唔透，所以CY要流露多啲人性化嘅一面。
小心謹慎 有政治潔癖
識咗CY廿幾年嘅阿Ann就話，CY只係大佢幾年，但就「老成持重」好多，係現今世代嘅「稀有動物」。何解咁講呢？皆因CY嘅一言一行都好小心謹慎，好似佢去年聖誕節送咗隻火雞畀CY，點知CY退番畀佢，話參選緊唔收得，所以佢話CY簡直有政治潔癖喎。
不過，冰山都有融化嘅一刻，阿Ann就試過喺朋友聚會逼CY大開金口，唱咗首《我的祖國》。原來CY同蔣麗芸爸爸蔣震都好有淵源，話說佢哋兩個都係「老山東」，有一次CY去探蔣震，蔣震就「話當年」，講番以前好窮嘅時候，大家要食番薯葉同番薯根。CY第二次再去探蔣震時就帶咗親手種嘅番薯葉畀蔣震。
社區組織協會嘅何喜華一直都支持CY，CY參選佢都有一齊落區，原來佢哋都識咗成卅年。但佢都頂唔順話CY份人好古板，稱呼人哋爸爸仲會講「令尊翁」。佢又話CY同佢講過，見到港人生活得咁鬱悶，好唔開心，佢覺得CY不妨講多啲自己嘅感受喎。睇嚟CY想做親民特首，首先要搞吓形象工程先得喇。