成日都話香港公務員隊伍係全世界最優秀，並唔係空口講白話㗎，淨係辦事效率高到冇人有，已經係鐵證啦。
嗱，如果大家仍然唔信公務員效率一流，咁就等功夫茶舉一個實例吖。公務員事務局宣布，今年四月一日起所有合資格男性公務員以及政府僱員都可以享用五天全薪侍產假，方便照顧太太同埋初生小寶寶。放取侍產假嘅僱員必須於嬰兒出世前連續受僱四十個星期或以上，估計每年大約三千名新任爸爸可受惠。侍產假呢家嘢，係曾蔭權舊年十月施政報告先至提出，未夠半年就可以落實，你話唔係效率一流都冇人同意啦！
大家可能會話，唓，只係明益自己友之嘛，又唔係惠及普羅大眾「福為民開」，把鬼咩！
冇錯，的確係明益自己友，港府自私基因又發作，之但係你又唔能夠否認，「福為官開」都係效率一流嘅表現。公務員事務局文件顯示，全職公務員、非公務員合約僱員以及政治委任人員，每次婚生嬰兒出世，均可享有五天全薪侍產假，公務員事務局局長仲可以視乎個別情況，酌情向合資格僱員嘅非婚生嬰兒批出侍產假。換言之，私生子嘅爸爸都有權放假，照顧得幾咁周到呀。
港府「福為官開」，公務員團體梗係表示歡迎喇，不過佢哋仲嫌唔夠喉，認為「產婦都有十個星期假，爸爸有十日最好，五日係好過冇」，建議當局一至兩年後檢討，增加侍產假日數喎。
大家或者會問，公僕爸爸有假放，私營僱員又如何？對於呢個問題，相信冇人可以提供答案，連曾蔭權都唔得。一來，公務員最擅長嘅永遠係為自己爭取福利，小市民通常擺埋一邊；二來，煲呔曾自私基因冠絕同儕，只係記得傍住富豪黐飲黐食，其他民生事情早就忘得一乾二淨；三來，夕陽政府夠鐘收工嘞，係都留畀下屆政府執手尾啦。所以咯喎，對於私營僱員做爸爸有冇假放嘅問題，暫時情況係普羅大眾冇運行。
照咁講，曾蔭權係咪自打嘴巴呀？佢曾經鼓勵香港人「最好生三個」，問題係小市民冇得放侍產假，好多人想生都唔敢喇。不如咁講，曾爵士乜都視作浮雲，民望係浮雲，政績係浮雲，廉潔係浮雲，係咪自打嘴巴根本唔重要，重要嘅係保皇黨繼續包庇護短，唔好畀佢嘅貪腐醜聞影響退休生活，就算冇仔生，咬長糧等於日日放有薪假！