日前，被喻為「生死戰」的首屆中學文憑試，率先開考的是中文科卷一閱讀能力及卷二寫作能力；寫作卷出現前所未有的抽象式「處境題」，要求考生就「刺蝟困境」——不要太近，也不要太遠，最好彼此保持一定距離的相處之道，貫穿現實生活之道，抒發體會及感受。
老朽曾是資深語文教師，倒覺得題目雖「艱深玄妙」，之不過，又真係考到參考學生嘅創意及能力，同時，如果考生多點留意新聞，多點用心思考，日常「依賴又排斥」嘅例子俯拾即是。好似婚姻的難處在於：我們和對方的優點談戀愛，卻和他（她）的缺點生活在一起。所以話，明白到婚姻制度的不足處：男女相處之道，就係要保持一定距離。
考生冇婚姻經驗，唔緊要，其實，由婚姻講到社會現象、人際關係，道理都係一樣，保持距離就唔會有咁多差錯，好似民主黨嘅甘乃威，兩年半前被揭「疑因求愛不遂怒炒女助理」，甘乃威一時「難以合作」，一時「有所好感」，好明顯就係唔明「距離」之道，尤其對女下屬嘅「友善鼓勵」。咁查一查，甘乃威就甩難，至於佢係唔係「清白」老朽依然迷離，之不過，納稅人要為呢單調查付出一百五十多萬元，公帑咁花法，冤枉啊！
講開又講，條題目幾應景，煲呔曾涉「曾商勾結」，又私人飛機又私人遊艇又曾大屋，講到尾，又係唔知做官要與富貴朋友保持一定距離。考生如果多留意本版，呢類處境題手到拿來。