立法會議席「出缺安排」，前身即係「替補機制」，會喺今屆立會任期內完成審議，喺安排剝晒大牙、將影響收到好窄後，各黨派對新方案嘅反應尚算正面，預料可順利通過。但人民力量立會議員陳偉業（大舊）就表明會繼續反對議案，仲已經向草案委員會主席提出幾十項修訂，擺明要同一眾高官議員玩「拉布」。
政制及內地事務局局長譚志源早前曾經死撐，話方案只不過限制辭職議員喺六個月內再參選，從來無剝削市民嘅投票權。大舊提出修訂內容千變萬化，包括將議案中嘅六個月改成五個月、四個月或者三個月等字眼，或者如果辭職議員肯支付補選產生嘅行政開支，政府就唔應該限制佢參選。
大舊話由於議員提出修正案無規定發言次數，所以佢同黃毓民會好似玩接力咁輪流發言。毓民話辯論當日會要求主席響鐘點人數，等班議員坐定定睇佢哋玩拉布。玩到咁盡，其他議員真係要諗吓計至得。