政情：楊耀忠訪中聯辦惹誤會
港區人大代表楊耀忠近年比較低調，好少喺媒體上面見到佢嘅消息，即使前排特首選舉搞到全港沸沸揚揚，身為選舉委員嘅佢亦唔見得特別活躍，從冇高調評論任何一位候選人，相當明哲保身。不過，我哋前日發現楊耀忠現身近排好多人出入嘅中聯辦，唔通中央有新指示？
話說前日一大批愛國愛港人士應邀去中聯辦同官員交流，呢班嘉賓以全國政協委員為主，當會面散場，大家相繼離開，身為人大代表嘅楊耀忠至「逆流」施施然嚟到中聯辦，在場傳媒當然唔會放過呢個機會啦，即時一哄而上影咗相至算，搞到楊耀忠有啲不知所措。
到底楊耀忠去中聯辦做乜？楊耀忠事後解釋，佢去中聯辦純粹為咗辦理中港車牌嘅續期手續，佢嘅車牌今個月底到期，若果唔續期的話就冇得用喇。佢仲話：「原來政協開會，我真係唔知乜事，仲問記者做乜影我相添，依家明白晒！」