政情：孫公忍痛復工拒談退休
早幾日因為半夜三更掛住睇球賽賽果，喺屋企跌傷右手搞到骨裂嘅教育局局長孫明揚尋日終於復工，精神同面色睇落都唔錯。孫公話依家傷勢已經無咩事，但係隻手就仲有少少痛，遲啲會去做物理治療。但係問到孫公點解唔考慮提早退休，孫公就無回應嘞。
孫公尋日乘坐佢嘅「AM 4」座駕，晨早八點幾就返到新政府總部開工，無因為病而偷懶。孫公睇落步履如常，面色亦都明顯比佢出院時「面青口唇白」好得多。佢同傳媒簡單交代咗幾句依家無咩事，就急急腳返辦公室開工，連記者問佢「幾時做物理治療」、「整傷咗點解唔諗吓提早退休」都無理。
孫公上次入瑪麗醫院係因為喺新政府總部染上退伍軍人症，唔知係新政府總部唔利佢，定係佢實在太勞累嘞。畢竟佢係一個腎衰竭病人，晚晚要洗腎，無論點，都唔可以將佢當作正常健康人看待。